താമരപൊയ്കയിൽ വാസന്ത ദേവത
സരോജമായി വന്നു പിറന്നു
ബാലാർക്ക ശീതള കിരണാവലിയിൽ
നവതാരുണ്യമായി വിടർന്നു
തരളിത ഹൃദയം സ്വപ്നലോകങ്ങളിൽ
ആരെയോ കൂട്ടിനു കൊതിച്ചു
വിരഹാർദ്രയായാ മുഗ്‌ദ്ധ സൗന്ദര്യം
സ്‌നിഗ്‌ദ്ധ തുഷാരമണിഞ്ഞു നിന്നു
മന്ദസമീരണൻ മന്ദം തലോടി
സുന്ദരിയവളുടെ ലോലകപോലങ്ങൾ
ചന്തമെഴുന്നൊരു നെറ്റിത്തടത്തിൽ
ഹിമകണത്താൽ പൊട്ടുചാർത്തി
ആമലർമടിയിലൊന്നുമയങ്ങവെ
ഋതുകന്യകയൊരു പൂക്കാലമായി
വൈഡൂര്യമണികൾ വാരിയെറിഞ്ഞു
വിഭാതമതിനൊരു സാക്ഷ്യമായി
No comments:
Post a Comment